Otsailaren 28tik martxoaren 8ra, Bermeok Aratusteak ospatuko ditu, adin eta gustu guztietarako ekimenekin. Musika, kalejirak, ikuskizunak, jaialdiak, dantzaldiak eta Tabernen Mozorro Lehiaketa izango dira egitarauaren protagonista.
Adin guztientzako egitaraua eta herriko elkarteen inplikazioa
Endika Etxebarria Telleria, Bermeoko Udaleko kultura zinegotziak, nabarmendu du aurten ere herriko talde, elkarte eta ikastetxeen laguntza ezinbestekoa izan dela egitaraua osatzeko.
Aratusteei hasiera emateko, Kanta Kanta Lorue taldearen kalejira izango da otsailaren 28an, 20:00etan Goiko Plazan. Herritar guztiak gonbidatuta daude mozorroarekin edo mozorro-osagarri batekin parte hartzera.
Lantzeko Inauteriak eta kalejirak
Zapatuan (otsailak 29), 12:30etik aurrera, Alkartasuna Dantza Taldea, KIETB erraldoi txiki konpartsakoak eta Tiriki Trauki fanfarrea Bermeoko kaleak girotuko dituzte. Miel Otxin erretzea Lameran egingo da.
Coro Maika taldeak ere 12:30ean hasiko du kalejira Goiko Plazatik, musika eta kantuekin herriko txokoak girotzeko.
Tostada txapelketak eta mozorro lehiaketak
Astelehenean (martxoak 3), 18:00etan, Demiku Jubilatuen Elkarteak antolatutako tostada eta mozorro txapelketa ospatuko da Gizarte eta Kultura Etxean.
Martitzenean (martxoak 4), 18:30ean, Erroxape Emakumeen Elkarteak bere tostada txapelketa egingo du Erretenen duen lokalean.
Aratuste martitzena: Egunik bereziena
Bermeoko Aratuste martitzena (martxoak 4) ospakizun handiena izango da. Goizean, herriko ikasleek kalejira erraldoia egingo dute, formatu berrituarekin:
10:30 – HH 3, 4 eta 5. mailakoak Xaiborren kamioiarekin, Artza frontoian amaituz
10:35 – LH 4, 5 eta 6. mailakoak Lameran amaituko dute, Xaiborren dantzaldiarekin
10:45 – LH 1, 2 eta 3. mailakoak Goiko Plazan amaituko dute, fanfarrea eta musikarekin
Aurten mozorrotzeko gaia «espaziora bidaia» izango da.
Eguerdian, 12:00etan, Erroxapeko Martxako emakumeak Bermeoko kaleak alaituko dituzte. 13:00etan, Ross Dantza Eskolaren erakustaldia izango da Lameran.
Arratsaldean, 17:00etatik 19:00etara, Disko Txiki Festa ospatuko da Lameran. Euria eginez gero, San Frantzisko Herri Ikastetxeko karpan egingo litzateke.
XXII. Tabernen Mozorro Lehiaketa
Aratuste martitzenean izango da XXII. Tabernen Mozorro Lehiaketa. Otsailaren 28ra arte tabernariek izena eman dezakete parte hartzeko. Orain arte, 14 tabernak konfirmatu dute parte-hartzea.
Irabazleak Aratuste martitzenean bertan jakinaraziko dira, epaimahaiak taberna guztiak bisitatu ondoren. Fanfarrearekin tabernaz taberna joango dira, eta herritarrak parte hartzera gonbidatu dituzte.
Martxoaren 8an, Vade Retro jaialdiarekin amaiera
Martxoaren 8an, Spookypheria Productions elkarteak Vade Retro jaialdia antolatuko du Bermeoko Kafe Antzokian, 21:30ean. Unholy Covers eta DC Data taldeek girotuko dute gaua.
Sarrerak:
Aurrez: 12€ Luma liburu dendan edo bermeokokafeantzokia.com
Eguna bertan: 15€ leihatilan
«Egitarau ikusita, jai giroa ez da faltako Bermeoko Aratusteetan. Herritar guztiak gonbidatzen ditugu parte hartzera eta mozorroak janztera!» adierazi du Etxebarriak.
Azkenik, Aratusteetako egitaraua osatzen lagundu duten elkarte, talde eta ikastetxeei eskerrak eman dizkie, «euren laguntzarik gabe horrelako egitarau bat antolatzea ezinezkoa izango litzateke».
