Lan hauen helburua irisgarritasuna bermatzea, kalearen itxura berritzea eta garbiketa-lanak erraztea da, herritarren bizi-kalitatea hobetzeko. Horretarako, errepidea eta espaloia maila berean jarriko dira, eta euri-urak bideratzeko granitozko “V” formadun pieza berezi bat instalatuko da. Horrez gain, zerbitzu-sarea lurperatzeko ahalegina egingo da, hornidura elektrikoaren, telekomunikazioen eta argiteriaren sareak lur azpian kokatuz, betiere egitura fisikoaren baldintzek aukera ematen badute.
Lanen egutegia eta trafikoan aldaketak
Astelehenean hasiko dira lanak eta hiru hilabeteko iraupena izango dute. Bi fasetan burutuko dira:
- Lehenengo fasean, Goiko Plazatik Aldatzeta kalerainoko tartea berrituko da.
- Bigarren fasean, Aldatzetatik Arresi kaleraino egingo dira lanak.
Obrek eragina izango dute trafikoan. Nardiz Tar Jon kalea itxita egongo da, lehenengo fasean Aldatzeta kaleraino, eta bigarren fasean kale osoan. Horren ondorioz, Intxausti kaleko trafikoaren noranzkoa aldatu egingo da, egokitzapen horiek behar bezala gauzatzeko.
Hondakinen bilketan aldaketak
Lanen eraginez, hondakinen bilketa-guneetan ere aldaketak egongo dira. Nardiz Tar Jon eta Intxausti kaleetako edukiontziak kendu egingo dira, eta erabiltzaileek Arana Tar Sabinen enparantzako (Goiko plaza) eta Arresi kaleko edukiontziak erabili beharko dituzte lanak amaitu arte.
Bermeoko Udalak barkamena eskatzen du lanak iraun bitartean sor daitezkeen eragozpenengatik.
