Lekeitioko Udako Arte Erakusketan parte hartu nahi duten artistek Lekeitioko Kultur Etxean eman dezakete izena edo eskaera posta elektronikoz bidali helbide honetara: kulturetxea@lekeitio.eus. Apirilaren 13ra arte egongo da irekita izen-ematea, eta erakusketak uztailaren 8tik abuztuaren 24ra bitartean egingo dira.
Parte-hartze baldintzak
Izena ematerakoan, artistek beren lanen argazkiak eta dokumentazioa (biografia eta erakusketaren azalpenak) aurkeztu beharko dituzte. Ondoren, Udaleko Kultur Saila arduratuko da lanak ebaluatzeaz.
Maiatzaren hasieran, onartutako eta baztertutako zerrenda argitaratuko da. Hautatutako parte-hartzaileen behin betiko zerrenda zozketa bidez osatuko da, eta Lekeitioko eta eskualdeko artistek lehentasuna izango dute.
Erakusketa egunak eta iraupena
Erakusketa bakoitzaren iraupena parte-hartzaileen kopuruaren arabera izango da. Hasiera batean astebeteko erakusketak izango dira, baina, parte-hartzaile kopurua txikia bada, iraupena bi astera luzatu daiteke.
Aurten ere, arte diziplina ezberdinetako lanak ikusteko aukera izango da Lekeition, artearen aniztasuna eta sormena sustatuz.
