Bermeoko itsas tradizioa islatzen duen artelana
Sancti Spiritus udal zaharren egoitzak artelan berri bat dauka bere hormetan eskegita, Jose Manuel Gabantxo margolari bermeotarraren «Bermeoko enbarkazioak» margolana. 1985ean sortutako lana da, eta bertan 34 itsasontzi irudikatzen dira.
Gaur goizean, ekitaldi bat egin da margolariari esker ona adierazteko. Bertan izan dira Bermeoko Udaleko ordezkariak, egoitzako arduradunak eta egoiliarrak, eta denek eskerrak eman dizkiote Gabantxori bere eskuzabaltasunagatik eta herriarekin duen konpromisoagatik.
Jose Manuel Gabantxo, itsasoa eta pintura uztartzen dituen artista
Ekitaldian, Endika Etxebarria Telleria, Gizarte Ongizaterako zinegotziak, margolariaren ibilbidea azaldu du: “79 urte ditu eta umetatik margotzeko zaletasuna izan du. Gaztetan baxurako flotan arrantzale ibili zen, eta gero, armadore eta Arrantzaleen Kofradiako lehendakari izan zen. Hala ere, inoiz ez du bere zaletasuna albo batera utzi, eta azken urteetan inoiz baino gehiago margotu du”.
Gabantxoren lanak hainbat lekutan ikus daitezke: Gaztelugatxeko San Juaneko baselizan, Arrantzaleen museoan, San Pedro Arrantzaleen Kofradian, besteak beste. “Bermeoko itsas historia errepasatzen duten ohitura-koadroak egiten ditu, eta portuaren iraganeko xehetasunak erakusten ditu”, adierazi du Etxebarriak.
Margolanaren historia: etxeko hormatik zaharren egoitzara
Jose Manuel Gabantxok azaldu du «Bermeoko enbarkazioak» margolana 1985ean margotu zuela. 1,85 x 0,90 metroko olioa da, eta udal ondarearen parte izango da. Margolan honetan 34 itsasontzi irudikatzen dira, eta margolariak bere koadroen artean 444 itsasontzi margotu dituela dio, horietako asko dohaintzan emanda.
Koadro hau 40 urtez egon da Gabantxoren etxean eskegita, eta berarentzat erlikia bat da. “Senitartekoek faltan botatzen dute koadroa etxeko horman, baina leku hori betetzeko beste lan bat egin dut dagoeneko”, azaldu du margolariak.
Egoiliarrentzako inspirazio-iturri
Gizarte Ongizaterako saileko zuzendariak, Jose Ramon Alberdik, azpimarratu du margolanak egoitzako ingurua edertzeaz gain, egoiliarrei inspirazioa eta itsasoko oroitzapenak ekarriko dizkiela.
Bestalde, Bermeoko alkateak, Nadia Nemeh Shomalyk, eta Gabantxok margolana udal ondasunen barruan geratuko dela ziurtatzeko dokumentua sinatu dute. “Keinu honekin, Jose Manuel Gabantxok bere herriarekiko konpromisoa berresten du, eta herriaren oroimenean iraungo duen arrasto artistikoa utzi du”, adierazi du alkateak.
