Bermeoko Lehen Hezkuntzako ikasleek aukera paregabea izango dute maiatzaren 25ean, domeka honetan, atletismoaren balioak ezagutzeko eta kirolaz lagun artean gozatzeko. Bermeoko Udala eta Taraska Atletismo Taldea elkarlanean antolatutako Atletismoko Haur Olinpiadak Artza frontoian egingo dira, goizeko 10:00etatik 12:00etara.
Proba anitz eginez ikasi eta gozatu
Ekimenaren helburu nagusiak izan dira atletismoaren oinarrizko modalitateak ezagutaraztea eta ikasleen artean giro ludiko eta parte-hartzailea sustatzea. Aurten, nobedade modura, luzera jauziaren ordez altuera jauzia egingo da. Horrez gain, vortex jaurtiketa, oztopo lasterketak eta abiadura probak izango dira jardunaldia osatuko duten probak.
Parte-hartze handia eta eskoletako inplikazioa
Iaz 135 ikaslek hartu zuten parte, eta aurten ere parte-hartze kopuru antzekoa izatea espero da. Parte hartu nahi duten ikasleek izena eskolan eman behar izan dute, eta maiatzaren 24a izan da horretarako azken eguna. Parte-hartzaile bakoitzak dortsala eskolan bertan jaso du.
Udalaren deia parte hartzera
Bermeoko Udalak haur guztiak animatu nahi izan ditu kirol jardunaldi berezi honetan parte hartzera, eta eskertu du hezkuntza komunitatearen eta familiaren inplikazioa, gaztetxoen artean kirol ohiturak eta elkarbizitza sustatzeko bidean.
