Bermeoko Udalak 2024ko aurrekontuaren kitapenaren datuak eman ditu azken osoko bilkuran, eta prentsaurrekoa egin du EAJk egindako adierazpenak salatzeko eta argibideak emateko.
Aurrekontuaren datu nagusiak
Nadia Nemeh Shomaly alkateak azaldu duenez, “kitapenaren emaitza 102.003,20 eurokoa izan da eta diruzaintza gerakina 23.306,10 eurokoa. Iazko exekuzioari dagokionez, gastuen betetze maila %82,70ekoa izan da; zorren betearazpena %91,12koa; eta sarreren betetze maila %83,42koa. Horrek erakutsi du kudeaketa arduratsua eta orekatua egin dela”.
Alkateak gaineratu du EAJk esandakoa gezurtatuz: “Dirua non dagoen galdetzen dute; ba, zati bat egonkortze prozesutik eratorritako indemnizazioetarako erabili da, eta beste zati bat Udalkutxara bueltatu da; guztira, milioi bat eurotik gora dago hor”.
Gobernuaren kudeaketa eredua defendatu dute
Udal Gobernuko kideek azpimarratu dute aurrekontuan aurreikusitako dirua benetan erabili dela: “Hori da kudeaketa on baten froga argiena. Udal batek bere baliabideak helburu zehatzetara bideratu eta gauzatu egin behar ditu, eta hori bete egin da 2024an”.
EAJren jarrera kritikatu dute: “ ‘Non dago dirua?’ bezalako galderek ardura politiko eza erakusten dute, eta gainera herritarren artean susmoa zabaltzeko arriskutsuak dira, udalaren sinesgarritasuna kolokan jarriz”.
Egonkortze prozesua eta aurreko gobernuaren erantzukizunak
Udal Gobernuak gogorarazi du egonkortze prozesua EAJren aurreko agintaldian hasi zela eta prozesu horren ondorioak 2024ko aurrekontuan islatu direla: “Prozesu horrek 450.000 euroko ordainsariak zekartzan eta hori aurreko gobernuak ezarri zuen; gaur egungo gobernuak ez du horren ardura”.
Aldundiari eta EAJri kritikak
Halaber, jakinarazi dute Bizkaiko Foru Aldundiak urte amaieran 721.000 euro kendu dizkiola Bermeoko Udalari Udalkutxatik. Egoera hori salatzeko mozio bat aurkeztu zuten azken osoko bilkuran, baina EAJk mozioaren aurka bozkatu zuela gogorarazi dute: “Horrekin argi geratu da euren lehentasun politikoak alderdiaren interesak direla, herritarren gainetik”.
Era berean, salatu dute Bermeoko zaharren egoitzako plazak ez direla behar bezala finantzatzen, eta karga ekonomiko hori udalaren gain erori dela: “Gaur egun egoitzaren kostua 1.146.146,52 eurokoa da udalaren aldean”.
Mezu argia: gardentasuna eta erantzukizuna
Udal Gobernuak nabarmendu du gardentasunez eta arduraz jokatu duela: “Aurrekontuaren kitapenari buruzko informazioa batzorde eta osoko bilkuretan azaldu da, eta EAJk hori ondo baino hobeto daki”. Hala ere, oposiziotik zabaldutako mezu faltsuek “marra gorria” gurutzatu dutela salatu dute: “EAJri eskatzen diogu zuzenketa publiko eta argia egin dezala. Bestela, Udal Gobernuak dagozkion neurriak hartuko ditu”.
Udalaren mezua herritarrei
Amaitzeko, Bermeoko Udalak adierazi du udalaren egoera ekonomikoa ona dela eta kudeaketa eredua “sendoa eta gardena” dela: “Gobernu talde honen helburua herritarren interesak lehenestea da, eta horretan jarraituko dugu lanean”.
