Bermeoko Arrain Azokak maiatzaren 16tik 18ra ospatuko du bere XXXI. edizioa, eta aurten ere milaka bisitari erakartzea espero da Bermeoko itsas ondarearen eta gastronomiaren erakusleiho paregabean.
Euskararen presentzia eta Euskaraldiarekin bat
Aurtengo edizioak Euskaraldiarekin bat egingo du, eta horren erakusgarri izango da azokaren kartela: galzorian dauden euskal hitzak ezabatuta agertuko dira, gure hizkuntzaren zaurgarritasunaz ohartarazteko. Antolatzaileek adierazi dutenez, azokako jarduera gehienak euskaraz eskainiko dira, eta jarduera nagusiak gaztelaniara itzuliko dira Arrain Azokaren YouTube kanaletik.
Bi egun seinalatu: LGTBI+ eta Itsas Emakumeak
Azokak bat egingo du baita maiatzaren 17ko LGTBI+ Fobiaren Aurkako Nazioarteko Egunarekin eta maiatzaren 18ko Itsas Sektoreko Emakumeen Nazioarteko Egunarekin. Bermeoko alkate Nadia Nemeh Shomalyk azpimarratu du azokak «gure produktuak eta nortasuna erakusteko erakusleiho onena» izango duela.
Hegaluze Saria emakumeentzat
Aurten XXVIII. Hegaluze Saria itsasoarekin lotutako emakumeei ematea erabaki dute, sektorearen hainbat arlotan egiten duten lan isil baina funtsezkoa aitortzeko. Alkateak nabarmendu du emakume horiek «gure komunitateen eta itsasoaren arteko harremana zaintzen eta eraldatzen» dutela.
Berrikuntzak eta klasikoak
Aurten Arrain Azokako Pintxo Lehiaketaren finala lehen aldiz barikuan jokatuko da, eta Kafe Antzokia, Toki Alai eta Beti Ondo tabernen artean izango da lehia. Zapatuan, berriz, euskal kanta herrikoiek hartuko dute habaneren lekua, Josepa Kale Kalekoen eta Ross Dantza Eskolako dantzarien eskutik.
Gainera, Bermeo Tuna World Capitalek (BTWC) dastaketa-tailerrak eskainiko ditu ume eta helduentzat, tunidoen ezagutza sustatzeko. Tailerretan parte hartu nahi dutenek Turismo Bulegoan eskuratu beharko dituzte tiket-ak.
Umeentzako eskaintza berezia
Umeentzako ekintzetan Galerna belaontziarekin itsas irteerak eta ‘Izan Arrantzale’ tailerra eskainiko dira, Kofradia Itxas-Etxea taldearen eskutik. Bestalde, ez dira faltako arrain salmenta, Arrantzaleen Museora doako sarrera eta Hegaluze eta Taho itsasontzietan itsas irteerak.
Elkartasuna Lameran
Solidaritza Gunea Lameran kokatuko da aurten ere, eta bertan marmitako eta hegaluze errea dastatzeko aukera egongo da, boluntarioen laguntzari esker. Bildutako dirua Bermeoko 6-12 urteko umeen tratamenduetara bideratuko da, Osakidetzak estaltzen ez dituen beharretarako.
Garraio publikoa eta ingurumenarekiko konpromisoa
Alkateak eta antolatzaileek eskatu dute Arrain Azokaren egunetan ibilgailuak ahalik eta gutxien erabiltzeko eta Bermeora garraio publikoa erabilita hurbiltzeko. Azokan erosketak egiteko poltsak ekartzeko eta sastarrontziak erabiltzeko deia ere egin dute, “herria garbi eta ingurumenarekiko arduratsuak” izateko.
Programazio osoa sarean
XXXI. Arrain Azokaren egitarau osoa eta eguneraketak eskuragarri daude https://bizibermeo.eus/arrainazoka/ webgunean eta sare sozialetan: Facebook (@arrainazoka), Instagram (bermeokoarrainazoka) eta YouTube (Arrain Azoka Bermeo).
Bermeoko alkateak eskerrak eman dizkie Arrain Azoka antolatzen aritu diren guztiei, eta herritar eta bisitari guztiak gonbidatu ditu: “Ez galdu aukera eta zatozte itsasoaren zaporea eta euskararen indarra bizitzera”.
