Bermeoko Udalak kanposantuko ordenantza berritu du gaurko osoko bilkuran, segurtasun juridikoa indartzeko eta familia-gatazkak saihesteko helburuarekin. Hemendik aurrera, hobi batetik gorpuak edo gorpuzkiak atera nahi dituenak ezin izango du prozesua sinatutako zinpeko aitorpen hutsez egin.
Gatazken eta hutsune juridikoen aurrean, neurri zorrotzagoak
Orain arteko araudiak zinpeko aitorpena onartzen zuen nahikotzat, baina horrek hainbat desadostasun eta administrazio-arazo sortu ditu, batez ere, horma-hobiaren titulartasuna eta hildakoaren oinordekotza ezberdinen artean. Egoera horiek erakutsi dute arautze eguneratu eta zorrotzago baten beharra.
Hildakoaren oinordeko zuzenaren egiaztapena, derrigorrezkoa
Ordenantzaren arabera, aurrerantzean, gorpu edo gorpuzki bat ateratzeko eskatzen duen pertsonak:
-
Bere nortasun-agiria eta datu pertsonalak aurkeztu beharko ditu.
-
Hildakoaren oinordeko legala dela egiaztatu beharko du, legez baliozkoa den dokumentazio bidez.
Zinpeko aitorpena ez da nahikoa izango eta objektibotasun handiagoko dokumentazioa eskatu beharko da.
“Aurrerapauso bat da berme gehiago emateko”
Nadia Nemeh Shomaly Bermeoko alkateak azaldu duenez, “arlo pribatuko gaiak dira, eta badakigu ordenantza honekin ezin direla gatazka guztiak ekidin, baina aurrerapauso bat eman gura izan da, interesdunei berme bat emateko”.
Eremu sentikor batean gardentasuna eta ordena
Ordenantza aldaketaren helburua da prozedura gardenagoa eta ordenatuagoa ezartzea, eta horretarako, parte hartzen duten pertsona guztien segurtasun juridikoa bermatzea. Halaber, familia arteko desadostasunak eta gatazkak prebenitzea ere bilatzen da, kontuan hartuta eremu honen sentikortasun sozial eta emozionala.
