Jazzber jaialdiaren XXVII. edizioa uztailaren 2tik 4ra ospatuko da Bermeoko Kafe Antzokian, eta aurten ere kalitate handiko jazz eskaintza ekarriko du doan. Kontzertu guztiak 20:30ean hasiko dira, eta sarrera librea izango da edukiera bete arte.
Jazzaren estilo eta ikuspegi anitzak oholtza berean
Edizio honetan parte hartuko dute Gorka Benítez Quartet, Cesar Vidal & Artikulation Band eta L.A.B. Trio taldeek, jazzaren estilo eta jatorri desberdinak uztartuz.
Ekimen hau Bermeoko Udalak eta Jizz Jazz Kultur Taldeak antolatzen dute, eta herritarrengana jazz musika hurbiltzeko konpromisoa berresten dute urtez urte.
Uztailak 2 – Gorka Benítez Quartet
Gorka Benítez saxo-jotzailea eta flautista da, eta David Xirgu (bateria) eta Dani Pérez (gitarra) lagun dituela, hirukote sendoa osatu du. Proiektu honetan Abel Boquera organo-jotzailea ere izango da laukotea osatuz. Euren errepertorioak musika korala, polifonia, popa eta jazza uztartzen ditu modu originalean.
Uztailak 3 – Cesar Vidal & Artikulation Band
Cesar Vidal buru duen boskoteak jazz garaikidea eta esperimentala lantzen du, inprobisazioa eta elementu elektronikoak uztartuz. Taldearen soinua akustikoaren eta digitalaren arteko mugak lausotzen ditu. Gainera, Jon Carranza bermeotarra kontrabaxuan ariko da, etxean jotzeko aukera berezia izango duelarik. Taldea osatzen dute baita ere Pietro Aloi, David Gimeno eta Jorge Care musikariek.
Uztailak 4 – L.A.B. Trio
L.A.B. Trio 2024ko urrian sortu zen Berlingo Jazz Institutuan, eta hiru herrialdetako musikariek osatzen dute: Leela (Berlin), Alexandre (Paris) eta Barnabas (Budapest). Talde honek estilo ugari nahasten ditu: groove, funk, fusioa, rock progresiboa eta afrokubatar soinuak, ikuspegi musikal anitzak batuz.
Jazzber: kultur erreferentea eskualdean
Endika Etxebarria Telleria, Bermeoko kultura zinegotziak, azpimarratu du Jazzber jaialdiak aukera ematen duela “jazz musika herritarrengana hurbiltzeko, zaletasuna eta ezagutza sustatzeko, eta genero horren joera berriak ezagutarazteko”.
Bestalde, Nadia Nemeh Shomaly, Bermeoko alkateak, eskerrak eman dizkio Jizz Jazz Kultur Taldeari: “Urte hauetan guztietan egindako lanari esker, Jazzber jaialdia erreferente bilakatu da. Kulturaren transmisioan funtsezkoa da udalaren eta herriko talde aktiboen arteko elkarlana”.
