Ondarroako Udalak irailaren 17an (eguaztena), 18:00etan, auzo batzarra deitu du Kofradia Zaharreko bigarren solairuan. Bilera honen helburua Alde Zaharrean eta Kamiñalden trafikoa murrizteko ezarri zen matrikula irakurgailu sistemaren balorazioa egitea da.
Lehen urteko datuen balorazioa
Urtza Alkorta Arrizabalaga alkateak azaldu duenez, “lehen datuak jaso eta urtebetera balorazio bat egiteko konpromisoa hartu genuen, eta horregatik antolatu dugu batzar hau, iritziak ezagutu eta denon artean balorazio bat egiteko”.
Matrikula irakurgailuak iazko martxoan jarri ziren martxan, eta urrian lehen datuak plazaratu ziren: ibilgailuen joan-etorriak %40 murriztu ziren. Udalak urtebeteko epean lehen balorazioa egitea agindu zuen, eta auzo batzarra konpromiso horren emaitza da.
Proiektuaren jatorria eta helburuak
Proiektua auzotarren eskaeratik abiatuta gauzatu zen, izan ere, Alde Zaharreko goiko kaleetan eta Kamiñalden trafiko handiak oinezkoen segurtasuna arriskuan jarri zuen. Helburu nagusiak bi izan dira:
-
Ibilgailuen joan-etorriak murriztea.
-
Oinezkoen segurtasuna handitzea.
Gainera, proiektua auzotarrekin batera diseinatu zen, kontuan hartuta abiaduraren mugak eta gehienezko denbora bezalako neurriak.
Bizilagunen iritziak entzuteko aukera
Auzo batzarrean bizilagunek euren iritziak partekatu ahal izango dituzte, hobetzekoak hobetzeko eta bizikidetza indartzeko. Bilkuran alkateak eta udaltzainburua izango dira bertan, herritarrekin batera balorazioa egiteko.
