Bermeoko Udalaren eta Europako Gizarte Funtsen dirulaguntzarekin bultzatutako EnpleGU: Ontziratu programa martxan da jada, eta 10 ikasle ari dira Bermeoko Nautika Eskolan formazioa jasotzen. Ekimen hau Bermeo, Mundaka eta Sukarrietako Behargintzak antolatu du Nautika Eskolarekin lankidetzan, eta programaren helburu nagusia da nautika eta arrantza sektorean laneratzeko benetako aukera eskaintzea udalerriko eta inguruko herrietako langabeei.
Udal ordezkariek ikasleei ongietorria emateko aukera izan dute, haien istorio eta motibazio pertsonalak ezagutuz. Parte-hartzaileek ikastaroarekiko interes handia erakutsi dute, eta esker ona agertu dute emandako aukeragatik, euren etorkizun profesionala hobetzeko benetako aukera modura ikusten baitute.
Programak formazioa egin izanagatik lan baimena eskuratzeko aukera ematen du, eta lan duina eskaintzen duten lanpostuetan lan egiteko prestakuntza ziurtatzeko aukera ere bai. Horrez gain, EnpleGU: Ontziratu programaren helburua da, batez ere, lan-merkatura sartzeko zailtasunak dituzten pertsonak prestatzea, orientatzea eta ahalduntzea.
“Programa honek funtsezko gaitasunak garatzen, konfiantza sortzen eta laneko etorkizunari eta etorkizun pertsonalari berme osoz aurre egiteko tresnak eskaintzen laguntzen du”, adierazi dute Behargintzatik.
Programa hau Bermeoko eta inguruko arlo ekonomiko eta sozialaren benetako beharrei erantzuteko sortu da, eta lau hilabeteko iraupena izango du. Ikasleek hurrengo irakasgaiak landuko dituzte:
- Itsasontziko segurtasuna eta lehen sorospenak (70 ordu): segurtasunezko oinarrizko prestakuntzaren baliokidea da.
- Arrantza-ontziko estalki lanak (30 ordu): Marinel-arrantzale ikastaroaren baliokidea da.
- Nabigazio eta gobernu guardia (60 ordu)
- Arrantza ateratzea tretzarekin, arrastearekin eta inguraketarekin (120 ordu)
Gainera, banakako eta taldeko orientazio pertsonalizatua eskainiko zaie ikasleei, “funtsezkoa baita sektorean laneratzeko aukerak hobetzeko”.
Neurrira egindako prestakuntzaren aldeko apustua
Bermeoko Udaletik azpimarratu gura da, konpromiso sendoa dagoela prestakuntza-programak herritarren beharretara etengabe egokitzeko. “Bermeo beti dago prest bere herritarren beharrei erantzuteko, eta programa hau horren adibide argia da. Programa honen bidez, lanik gabe dauden eta lan-baimenik ez duten pertsonei aukera ematen die, 1. mailako lanbide-ziurtagiri baten bidez, beren egoera soziolaborala erregularizatzeko eta lan duinetara sartzeko, gure udalerriko eta eskualdeko behar errealetara egokitutako testuinguruan, irteera erreal eta eskuragarriekin. Aukera erreal bat da itsas-arrantza sektorean aro profesional berri bat hasteko, gure kostaldeko zutabeetako bat”, adierazi du Nadia Nemeh Shomaly alkateak.
