Bermeoko Udalak jakinarazi duenez, Gizarte Ongizaterako Sailak, hurrengo urtean ere, nagusiei zuzendutako Gorputza martxan eta Burua martxan programak eskaintzen jarraituko du. Bi programetan parte hartzea doakoa izango da eta zahartze aktiboa sustatzea da helburua.
Burua martxan programaren kasuan, galera kognitiboa ekiditea du xede. Parte hartzeko 24 lekuren esleipena egingo da, bi taldetan banatuta. Parte-hartzaileak 65 urtetik gorakoak izan behar dira, eta ezingo dute buruko gaixotasunik eduki. Bi saio egingo dira astean, astelehen eta eguaztenetan, ordu eta erdikoak.
Gorputza martxan programan, aldiz, galera fisikoa ekiditea da helburua. 60 pertsonek parte hartzeko aukera izango dute, lau taldetan banatuta. Parte-hartzaileak 70 urtetik gorakoak izan beharko dira, eta ezingo dute gaixotasun fisiko larririk eduki. Astean bi saio ordu betekoak egingo dituzte.
Izena emateko epea abenduaren 11a baino lehen izango da. Zozketan parte hartu nahi dutenek, 675 916 856 telefono zenbakira deitu beharko dute, astelehenetik barikura, 09:00etatik 14:00etara. Lehentasuna izango dute 75 urte edo gehiago duten herritarrek, menpekotasun egoera gradu I dutenek eta senitarteko jagole direnek.
