AEK-k argitaratu du Sopelako Esaera Zaharren Txapelketa ardatz duen liburua, Uribe Kostako Mankomunitatearen dirulaguntzarekin. Lana apirilaren 17an, ostiralean, aurkeztuko dute Kurtzio Kultur Etxean, 19:00etan. Argitalpenak izenburu hau dauka: Sopelako Esaera Zaharren Txapelketa: edo nola (ez) antolatu herri-ekintzak.
30 edizioren ibilbidea jasotzen duen lana
Liburuaren egilea Aitor Fdez. de Martikorena Rodríguez da, txapelketako antolaketa-taldeko kidea. Lana Txapelketaren 31. edizioaren atarian aurkeztuko dute, eta lehen zatian orain arte egin diren 30 edizioen historia eta ibilbidea bildu dituzte. Horrela, urte hauetan ekimenak izan duen garapena eta herrian utzi duen arrastoa jaso dituzte.
Irudiak eta material historikoa, bigarren atalean
Bigarren zatian, txapelketaren inguruko material ugari batu dute: kartelak, oroigarriak, pegatinak, lehiakideak, bertsolariak eta beste hainbat irudi eta argazki. Atal horren bidez, ekimenaren memoria grafikoa osatu dute, urteotan sortu den giroaren eta parte-hartzearen lekukotza eskainiz.
Irakasleentzako baliabide erabilgarria
Hirugarren atala euskara-irakasleentzat pentsatuta dago. Bertan, 207 atsotitz bildu dituzte, azalpenekin eta bertsoekin hornituta. Horregatik, liburua baliagarri izan daiteke atsotitzak eta bertsoak lantzeko, bai ikasgelan bai bestelako hezkuntza-jardueretan.
AEKren aitortza eta herriaren babesa
AEK-k txapelketa omendu nahi izan du liburua argitaratuta, ekimenak urtero jende kopuru handia biltzen duelako euskararen alde. Gainera, 30 edizio bete izanak ere eragina izan du argitalpena kaleratzeko erabakian. Uribe Kostako Mankomunitateak, bestalde, diruz lagundu du proiektua, lehiaketak herrian euskararen presentzia indartzeko egiten duen ekarpena aitortuta.
Herriaren aitortza ere jaso du txapelketak
Urteen poderioz, txapelketak herriko tabernen eta merkatarien babesa ere lortu du. Antolatzaileen esanetan, horrek erakusten du herriak ekimena estimatzen duela. Horren adibide izan da antolaketa-taldeko kideak Sopelako iazko jaietako pregoilariak izan direla. Tartean egon da Aitor Fdez. de Martikorena bera, gaur egun antolakuntza-lanetan denbora gehien daraman kideetako bat.
