Durangok Itzulia Basque Country 2027ko etapa baten helmuga hartuko du, Udalak eta lasterketa antolatzen duen OCETA elkarteak gaur, urriaren 21ean, sinatutako akordioaren ondorioz.
Apirilaren 5etik 10era jokatuko da, eta Durangon amaituko den etaparen xehetasunak aurrerago jakinaraziko dira.
Durangoren eta txirrindularitzaren arteko lotura
Akordioak Durangok txirrindularitzarekin duen harreman historikoa indartuko du. Herriak urte luzez hartu ditu maila goreneko txirrindularitza probak, tartean Itzulia bera eta Durango-Durango Emakumeen Saria.
Etaparen helmuga hartuta, herritarrek nazioarteko mailako kirol ekitaldi bat gertutik bizitzeko aukera izango dute.
Itzulia: Tokiko ekonomiari bultzada
Udalaren arabera, hitzorduak kirol ikusgarritasunaz gain tokiko jarduera ekonomikoa dinamizatzen lagunduko du.
Txirrindularitza zaleen etorrerak Durango ezagutarazteko eta herriko merkataritza zein ostalaritzari jarduera gehigarria sortzeko aukera eskainiko du.
Itzulia Basque Country 2027ren ibilbide osoa eta Durangon amaituko den etaparen xehetasunak datozen hilabeteetan jakinaraziko dira.