Bermeo, Mundaka eta Sukarrietako Behargintzak EnpleGU programan parte hartuko du, ikasketa-maila baxua duten eta lana aurkitzeko zailtasunak dituzten pertsonentzat enplegu-aukerak sortzeko. Garapen Agentzien Euskal Elkarteak eta Euskal Herriko sei garapen-agentzik elkarlanean garatutako proiektua da.
Langabezian daudenentzako laguntza eta prestakuntza
EnpleGU programa langabezian dauden, prestakuntza gutxi duten eta lan-merkatuan sartzeko oztopoak dituzten pertsonei zuzenduta dago. Helburua da parte-hartzaileei funtsezko trebetasunak eta gaitasun profesionalak garatzen laguntzea. Behargintzatik azaldu dutenez, “programak lana aurkitzeko behar den konfiantza eta gizartean parte hartzeko tresnak eskaintzen ditu. Hazkunde pertsonal eta profesionalerako lagungarria da, oztopoak gainditzeko eta lan-aukerak hobetzeko prestakuntza eskainiz.”
Itsas sektorean prestakuntza, Bermeoko Nautika Eskolarekin elkarlanean
EnpleGUren barruan, Behargintzak «Prestatu» izeneko ibilbidea eskainiko du, hau da, aldez aurretik hurbilketako prestakuntzak egin dituzten edo lan-merkatuan sartzeko prest dauden pertsonentzat. Ibilbide hau Bermeoko Nautika Eskolarekin elkarlanean garatuko da, homologatutako prestakuntza espezializatua eskainiz.
Helburua itsas sektorean lan egin nahi dutenei beharrezko ikastaroak eskaintzea da:
- Itsasontziko segurtasuna eta lehen sorospenak (70 ordu).
- Arrantza-ontziko estalki-lanak (30 ordu).
- Arrantza-aparailuak muntatzea (190 ordu).
Formakuntza martxotik ekainera bitartean
Formakuntza eta orientazio-saioak 2025eko martxotik ekainera bitartean eskainiko dira. Programa honetan parte hartzen dutenek aukera izango dute prestakuntza teknikoak egiteko, lan-merkatuan sartzeko edo prestakuntza aurreratuagoarekin jarraitzeko.
Parte hartzeko izen-ematea zabalik
EnpleGU programan parte hartu nahi dutenek Behargintzan eman behar dute izena:
📍 Zubiaur tar Kepa Kalea 26-28, Bermeo
📞 94 617 91 90
Lana bilatzeko prestakuntza eta laguntza behar dutenentzako aukera paregabea! 🚢🎓
