Bermeoko Sancti Spiritus udal zaharren egoitzak arretaren eredu tradizionaletik urrundu eta pertsonan oinarritutako arreta eredua ezartzeko urrats sendoa eman zuen 2023an. Egindako lan guztiaren ostean, Pertsonarengan Zentratutako Arreta eta Lotura Fisiko/Kimikorik Gabeko Zentro izendapena lortu du. Ziurtagiria datorren astelehenean, otsailak 17, 11:00etan jasoko du ekitaldi berezi batean.
Etxekulez proiektua: etxeko berotasuna egoitzara ekartzea
Proiektuak ETXEKULEZ izena hartu du, egoitzako erabiltzaileek, langileek eta senideek hautatuta. Helburua zaintzaren kultura aldatzea eta paternalismoa alde batera uztea izan da, autonomia eta parte-hartzea sustatzeko. Eredu berrian ez dira lotura fisiko edo farmakologikoak erabiltzen, eta egoiliarren duintasuna eta eskubideak errespetatzen dira.
Langileen prestakuntza eta eraldaketa prozesua
Eredua ezartzeko, langile guztiek 100 ordu inguruko formakuntza jaso dute. Halaber, Talde Gidari bat sortu zen prozesua bultzatzeko. Cuidados Dignos Fundazioarekin lankidetzan aritu dira, prestakuntza eta aholkularitza jasoz. Hasieran mesfidantzak eta erresistentziak izan badira ere, lortutako emaitzek eszeptikoak konbentzitu dituzte.
Loturen kentzea eta arreta pertsonalizatua
Lehenengo urratsa mugimendua oztopatzen zuten lotura mekanikoak kentzea izan zen (gerrikoak, oheko barandak). Ondoren, lotura farmakologikoak murriztu dira, egoiliarrek euren izaera berreskuratu dezaten. Horretarako, bizi-istorioak berreraiki eta diziplina anitzeko taldearen parte-hartzea sustatu da.
Familien balorazio positiboa
Egoiliarren familiek proiektuaren eragin positiboa nabarmendu dute. Josune Gabantxo Bereinkuak, egoitzan ama duen senideak, aldaketaren eragina azaldu du: «Ama aktiboago dago, gure izenak gogoratzen ditu, barre egiten du eta abesten du». Etxekulez proiektua esperientzia paregabea izan dela adierazi du.
Udalaren aitortza eta Bizkaiko bigarren egoitza publikoa
Endika Etxebarria Telleria, Bermeoko Gizarte Ongizaterako zinegotziak, langileen lana goraipatu du: «Bermeoko udal egoitzako langileek esfortzu handia egin dute. Lortutakoa garrantzitsua da, baina are gehiago da eredu hau ezartzea. Izan ere, Bizkaiko bigarren egoitza publikoa gara eredu hau duenak».
Sancti Spiritus egoitzak zaintzaren etorkizuna irudikatzen duen eredu berritzailea ezarri du.
