Ondarroako Udalak espazio publikoko terrazak kudeatzeko araudia eguneratzeko prozesu parte-hartzailea abiarazi du. Azken urteetan, hainbat herritarrek kezkak adierazi dituzte, batez ere zarata, irisgarritasun eza, zikinkeria eta okupazio handiegia direla eta. Horri erantzuteko, tabernariekin, herritarrekin eta eragile sozio-kulturalekin lanketa egin da, Argi Begi bitartekaritza enpresaren laguntzarekin.
Herritarren kexak eta helburua
Herritarrek adierazitako arazo nagusiak hauek izan dira:
- Zarata eta deskantsuaren kaltetzea
- Irisgarritasun arazoak
- Espazio publikoaren okupazio gehiegizkoa
- Ekintza kulturalak oztopatzea
Ondarroako Udalaren helburua elkarbizitza osasuntsua sustatzea da, guztion eskubideak errespetatuko dituen ordenantza bat sortuz. Horrela, aisia, mugikortasuna, deskantsua eta lana orekan mantentzeko irizpideak ezarri dira.
Alegazioak aurkezteko epea zabalik
Behin-behineko ordenantzari alegazioak aurkezteko 30 laneguneko epea dago. Alegazio horiek horretarako prestatutako orri berezian aurkeztu behar dira. Prozesua hirigintza batzordetik pasa eta udalbatzak onartu ostean zabaldu da, eta jaso diren alegazioak aztertu eta erabakia hartu ondoren, behin betiko bertsioa udalbatzara eramango da.
Ordenantzaren edukia eta zehapen araubidea
Prozesua konplexua izan da, alderdi guztiak kontuan hartu behar izan direlako, bai eta lege-esparrua errespetatu ere. Herritarren artean errealitate oso desberdinak daude, eta horiek guztiak aintzat hartuta, elkarbizitza bermatzeko araudi bat osatu da.
Gainera, zehapen araubide bat ezartzea aurreikusi da. Zehapenak proportzionaltasunaren printzipioa kontuan hartuta ezarriko dira, eta hasieratik argi utzi nahi da arau-hausteen mailakatzea eta horrek dakartzan ondorioak.
Ondarroako Udalak herritarren parte-hartzea eta iritziak jasotzea lehenetsi du, eta horregatik, alegazio epea baliatzeko deia egiten du.
