Bermeoko Udalak bat egin du aurten ere Euskaraldiarekin, euskararen erabilera bultzatzeko helburuarekin. Euskaraldiaren lehen egunean, udaleko arduradun politikoek eta langileek familia argazki bat atera dute egitasmoarekin bat egiten dutela adierazteko. Gainera, udal langileak protagonista dituzten hiru bideo labur grabatu dituzte, eta sare sozialen bidez zabalduko dira. Lehenengoa gaur bertan argitaratu da, eta hurrengo biak datorren astean ikusgai izango dira.
Euskaraldiaren helburua: ohiturak astindu eta euskaraz bizitzeko baldintzak sortu
Udalak azpimarratu du Euskaraldiaren helburu nagusia dela hizkuntza-ohituren inertziak astintzea eta euskara gehiago erabiltzeko urratsak ematea. Aldi berean, tokian tokiko euskalgintza aktibatzea eta euskaraz bizitzeko aukerak zabaltzea du xede. Bermeoko Udalak adierazi du orain arte egin bezala, hemendik aurrera ere lanean jarraituko duela euskararen normalizaziorako urratsak emateko, bere esku dagoen guztia eginez.
Herritarren parte-hartzea, ezinbestekoa
Euskaraldiak 11 egun iraungo baditu ere, Udalak gogorarazi du garrantzitsua dela dinamika horri jarraipena ematea. Horretarako, ezinbestekoa da herritarren inplikazioa, bai Ahobizi, bai Belarriprest roletan. Helburua da harreman instituzionaletan eta herritarren arteko eguneroko harremanetan euskararen erabilera sendotzea, eta ohiturak aldatzen jarraitzea.
Keinu txikiek eragin handia dute
Udalak nabarmendu du keinu sinpleek —hala nola lehen hitza euskaraz egitea edo jarrera aktiboa izatea— garrantzi handia dutela ohiturak aldatzeko. Ariketa indibiduala izan arren, kolektiboa izatea bilatzen da, eta horrek benetako aldaketak eragin ditzake bai norbanako mailan eta baita kolektiboetan ere.
Parte-hartze zabala Bermeon
Bermeon, 1.663 lagunek eman dute izena Euskaraldian: 1.420 Ahobizi eta 243 Belarriprest. Udalak dei egin die guztiei txapak jartzeko eta euskara kalean, lanean, elkarteetan zein enpresetan erabiltzeko. Helburua da euskara erdigunean jartzea, autoestimua eta irudi kolektiboa sendotuz eta Bermeoren identitatearen ezinbesteko elementu gisa indartuz.
Amaitzeko, Irune Astiazaran Allikaren hitzak gogoratu dituzte Udaletik: “Guztiok gara euskararen etorkizuna”. Euskaraldia aukera paregabea da urrats berriak emateko, eta denon artean euskaraz bizi ahal izateko baldintzak sortzeko.
