Parte-hartze handia izan da aurten Bermeoko jaietan, kaleak eta plazak jendez beteta ikusi baitira ekitaldi gehienetan. Euri tarteak izan arren, programatutako jarduera guztiak egin ahal izan dira, eta udalak balorazio oso positiboa egin du.
Giro bikaina eta herritarren inplikazioa
Endika Etxebarria kultura zinegotziak azpimarratu du ekitaldi guztietan giro bikaina nagusitu dela. Kontzertuak, antzerkiak, kalejirak eta protokolozko ekitaldiak jendez bete dira. Nabarmendu du Puro Relajo taldearen kontzertua, domekan izan arren, jendetza bildu zuena eta jaietako unerik gogoratuenetakoa bihurtu dena.
Almikako Jaitsieraren berrikuntza
Aurten, Almikako Jaitsieraren antolaketan aldaketa izan da, Jai Batzordeak hartu baitu ardura. Parte hartzeko aurrez izen-ematea ezarri da, eta hasierako zalantzak gorabehera, balorazioa oso positiboa izan da eta parte-hartze handia egon da. Udalak eskerrak eman dizkio Jai Batzordeari eta herritarrak animatu ditu ekarpenak egitera.
Txosna batzordearen lana eta etorkizuneko aldaketak
Etxebarriak Txosna Batzordearen prestutasuna ere eskertu du, elkarlana “funtsezkoa” dela azpimarratuz. Datorren urtera begira, ekitaldiren baten data aldatzea aztertzen ari da udala, esaterako bertso saioa beste egun batean egitea, jende gehiago erakartzeko.
Ordutegi aldaketak eta herritarren balorazioa
Aurten su artifizialak eta Xixiliren doluzko ibilbidea ordu erdi aurreratu dira. Herritarrek aldaketa oso ondo hartu dute, eta etorkizunean mantentzeko asmoa dago.
Puntu Morea eta Gautxoria
Aurten ere martxan egon da Puntu Morea, lau egunetan, Lameran. 20 eta 30 urte bitarteko gazteak izan dira nagusi. Baliabidea beharrezkoa dela frogatu da, nahiz eta hezitzaileekiko mespretxuzko jarrerak salatu behar izan dituen udalak.
Bestalde, Gautxoria zerbitzuak parte-hartze handia izan du, eta horrek hondakin gehiago ekarri baditu ere, udalaren garbiketa-zerbitzuen lanari esker herria baldintza onean mantendu da. Udalak gogorarazi du herria garbi mantentzea herritar guztien ardura dela.
Esker ona langile eta herritarrei
Udalak eskerrak eman dizkie udal langileei, euren isilpeko lana “funtsezkoa” dela nabarmenduz. Era berean, jaiak antolatzeko lanean parte hartu duten pertsona eta elkarte guztien ekarpena eskertu du, euren lana ezinbestekoa izan delako jaiak arrakastaz ospatzeko.
