Ondarroako portu eremuak herrian hartzen duen espazioa oso zabala da, eta Eusko Jaurlaritzaren Portu Zuzendaritzaren eskumenekoa da. Otsailaren 27an, Irina Alkorta jarduneko alkateak eta Koldo Goitia, Eusko Jaurlaritzako Itsasertzaren Garapenaren, Portuen eta Itsas Gaien zuzendariak, hitzarmen bat sinatu dute. Akordio honi esker, Ondarroako Udalak portuko jabari publikoaren barruko hainbat gune eta trafikoaren kudeaketa bere gain hartuko ditu.
Zein eremu hartzen ditu hitzarmenak?
Portuaren eremua Zubi Zaharreraino iristen da eta, orain ere, Eusko Jaurlaritzaren jabetzakoa izango da. Hala ere, udalak kudeaketa bere gain hartuko du, herritarrek espazio horien erabilera zuzenean kudeatzeko aukera izan dezaten.
Hitzarmenak bost urteko iraupena dauka, eta bosna urteko beste bi luzapen egiteko aukera aurreikusten du.
Kudeaketa udalaren esku geratuko den eremuak:
- Trafikoaren kudeaketa: Txori Errekako biribilgunetik portuko biribilgunerainoko tartea.
- Espazio publikoak:
- Antiguako Ama kalea
- Itsasaurre plaza eta bertako aparkalekua
- Alameda
- Kafeatzea
- Nasa Kaleko espaloia
- Astilleru
Ondarroako Udalak, guztira, 35.545,26 metro karratu jasoko ditu emakidan Portu Zuzendaritzatik:
- 30.469,60 metro karratu guneen kudeaketa eta ustiapenerako.
- 5.075,66 metro karratu trafikoaren kudeaketarako.
Hitzarmenaren onurak Ondarroako herriarentzat
Hitzarmen honek herriko kultur eta aisialdi ekitaldien antolaketan eragin handia izango du. Orain arte, Portu Zuzendaritzak kudeatzen zituen espazioetan egiten ziren hainbat jarduera:
- Andra Mari jaiak, Galiza Etxearen jaiak, Merkatu Txikia, estropadetako fan-zone, liburu azoka, Antxoa Eguna, triatloi herrikoia, kontzertuak, ikuskizunak, Naberan Krosa, Ondarru-Lekitto lasterketa, puzgarriak, dantza saioak, etab.
Lehen, talde edo elkarte batek ekitaldi bat antolatu nahi zuenean, udalak baimen eskaera berezia egin behar izaten zuen, eta dagokion tasa ordaindu. Hitzarmen honi esker, udalak zuzenean kudeatuko ditu eremu horiek, tasak ez ditu ordaindu beharko, eta burokrazia murriztuko da, denbora eta dirua aurreztuz.
Iaz, udalak 40 jarduera desberdinetarako egin behar izan zituen izapide guztiak Portu Zuzendaritzarekin, eta hitzarmen honek, prozesua erraztuko du, herriko ekitaldien antolaketa arintuz.
