Uztailaren 10etik abuztuaren 24ra, arte garaikidea izango da protagonista Eskolape erakusketa aretoan ospatuko den Udako Arte Erakusketaren edizio berrian. Lau artistaren lanek osatuko dute egitaraua, diziplina, genero eta sormen ikuspegi ezberdinak uztartuz. Urtero legez, ekimenak arte garaikidearen aniztasuna eta tokiko nahiz nazioarteko sortzaileen ekarpena plazaratuko ditu herriko bihotzean.
Txus Cuende: teknologia eta irudimenaren arteko mugan
Uztailaren 10etik 20ra, ikusgai egongo da “Eta bizia sortu zen” izeneko erakusketa. Txus Cuende, Barakaldon jaioa eta Munitibarren bizi den artista digitala, sorkuntza digitalaren eta errealitate areagotuaren arteko topalekua proposatu du. Zortzi irudik osatzen duten lanek pertsonaia hibridoak aurkezten dituzte, eta ikusleek mugikorraren bidez bizia hartzen duten irudiak ikusi ahal izango dituzte.
Arantza Young: itsasoaren eta emakumearen arteko lotura
Uztailaren 21etik 27ra, Arantza Kalzakorta Elorriagaren (Arantza Young) lanak hartuko du protagonismoa. Gernikan jaiotako eta nazioarteko ibilbidea duen artistak, emakumea eta itsasoa lotzen ditu bere lanetan, ikus-entzunezkoetatik abiatuta arte bisualera igaroz. Genero ikuspegia eta natura dira bere obren bi ardatz nagusi.
Juan Isasi Urdangarin: Lekeitio begirada akuarelaz
Abuztuaren 11tik 17ra, Juan Isasi Urdangarin bilbotarraren “Lekeitio, Makro eta Mikro” izeneko erakusketa izango da ikusgai. Akuarelaren bidez, artistak argia, ñabardurak eta formaren sinpletasuna baliatuko ditu Lekeitioko inguruneaz gogoeta egiteko. Lanek egunerokoaren edertasun xumean sakontzeko aukera eskainiko dute.
Jose A. Karkamo “Kiki”: sormenaren ibilbide oso baten sintesia
Abuztuaren 18tik 24ra, ikusleek Jose A. Karkamo “Kiki” artistaren ibilbidean murgiltzeko aukera izango dute “Urte asko eta gero…” erakusketaren bidez. Autodidakta eta diziplina anitzeko sortzaileak pintura, ikus-entzunezkoak eta eszenografia uztartuko ditu, bere sormenaren pasarte pertsonal eta kolektiboen bidez kontakizun bat eraikiz.
Kultur topagune bat uda giroan
Erakusketa hau Lekeitioko Udalak babesten duen kultur jarduera garrantzitsua da, eta bisitari nahiz herritarrentzat artea gertutik eta modu berritzailean bizitzeko aukera paregabea eskaintzen du. Eskolape aretoa, uda partean, sortzaileen eta ikusleen arteko topagune bizidun bilakatuko da.
Ez galdu aukera: uztailaren 10etik abuztuaren 24ra, Lekeition arteak arnasa hartuko du.
